寵物 2006年10月25日
(57025.jpg )Chivas大個仔, 搵到野做喇!!
其實係我o係溫哥華有意無意間搵到一間賣狗仔衫o既舖頭, 咁買多幾次之後就同老板娘熟落左. 而咁岩上個禮拜有間幫電影/廣告公司訓練動物o既公司搵佢介紹狗仔去拍硬照廣告. 而Chivas有幸得到老板娘介紹去試鏡.
試鏡過程都唔算太難, 因為佢係想搵一隻肯著衫, 唔怕由陌生人拖住佢行o既狗仔. 好彩Chivas係鐘意同人玩多, 所以對佢黎講唔係問題. 亦因為咁, Chivas得到今次呢個job. 而且仲益左我朋友隻Seymour去做Chivas o既Backup, 齊齊有工做!!
今朝一早, 帶Chivas同Seymour去到拍攝場地, 第一件事已經好興, 因為包場關係, 另到Chivas可以進入一個我諗都諗唔到o既地方 — 咖啡室! 因為加拿大o既衛生條例, 狗隻係唔入得o既! 好難得!!
到開始拍o既時候, 簡單o的講, Chivas係用左差唔多5-6個鐘不斷咁練走位, 到最後一個鐘先至交到貨比攝影師. 最初諗住影硬照會好舒服啦, 點知佢想要有動感o既效果, 所以要不斷行黎行去. 佢唔累, 但係我反而要經常一影完就要抱起佢走番去原位等佢再行過, 我就累到飛起!!
不過最終都交到貨, 各方面都算幾滿意, 可以話幾開心. 而家唯一等o既係, 等廣告公司做埋後期, 咁就可以o係報紙同雜誌見到Chivas有份o既廣告. 雖然人工唔高, 但係可以當係比Chivas o既一次經驗, 比我o既memory.
到時個廣告一出左, 我會scan左佢, 比大家睇下Chivas第一份工o既成績
最意想不到, 但係令我最開心o既係, 佢呢個廣告係——————————-Starbucks!!
(1)